ولسمشر احمدزي په لویه څارنوالۍ کې د
اصلاحاتود راوستو په اړوند یوه غونډه کې له رسنیو وغوښتل چې د فساد د دود د
ختمولو لپاره په ولس کې د فسادپر ضد روحیه غښتلې کړي.
ښاغلي احمدزي تېر ماښام د پوهنتونونو استادان، حقوق پوهان، د سوداګرۍ خونې غړي، مدافع وکیلان،
صنعتکاران، د بشري حقونو او د ښځو د ټولنو غړي ارګ ته وربللي ول ،چې په لویه څارنوالۍ کې د اصلاحاتو د
راوستلو لپاره مشورې ترې واخلي .
د ارګ د خبرپاڼې له مخې ، دغونډې برخه والو د
لویې څارنوالۍ د مشرتابه پلاوي د ټاکل کېدو د معیارونو، د فساد د مخنیوي، د
مکافاتو او مجازاتو د اصل د پلي کیدو په باب خپل نظرونه او وړاندیزونه له ولسمشر سره شریک
کړل او له هغه څخه یې وغوښتل چې په لویه څارنوالۍ کې کوټلي بدلونونه راولي.
ښاغلي احمدزي د غونډې د برخه والو د نظرونو او
وړاندیزونو له اورېدو وروسته وویل ،« د څارنوالۍ اصلاح یوه حیاتي موضوع ده ځکه چې د عدالت ټینګښت هم په همدغه
بنسټ پورې اړه لري. موږ باید داسې څارنوالي ولرو چې د افغانستان خلک پر هغې باور
ولري.»
ولسمشر ټینګار وکړ چې ،څارنوالي باید د ټولنې له هر وګړي سره بې
توپیره چلند وکړي، د قانون په وړاندې قوي او کمزوری وجود نه لري، د ټولنې هر وګړی
د قانون پر وړاندې یو خيل حقوق او مکلفیتونه لري .
دا پداسې حال کې
ده چې ،د شفافیت د نړیوالې
ادارې، د راپورونو له مخې افغانستان دنړۍ دهغو دریو هیواد څخه دی چې د فساد کچه پکې
تر ټولو لوړه ده .
ښاغلي احمدزي دا هم وویل چې ، د قانون له حاکمیت پرته خصوصي سکټور نه شي
کولای
فعالیت وکړي، د قانون په پلي کیدو سره به په هېواد کې بنسټیز بدلونونه راشي .
نوموړي زیاته کړې
، افغانستان یو اساسي فرهنګي
بدلون ته اړتیا لري، داسې فرهنګي بدلون ته چې د فساد د فرهنګ مخه ونیول شي او له
فساد سره د مبارزې فرهنګ پیاوړی شي.