د ناټو مشران هیله لري چې راتلونکې میاشت د دوی په سرمشریزه
کې د افغانستان نوی ولسمشر ګډون وکړي خو په افغانستان کې د انتخاباتو نتیجه
لا روښانه شوې نه ده.
د تړون ځینو چارواکو ویلي چې دوی نه غواړي چې حامد کرزي ته په
دې غونډه کې د ګډون بلنه ورکړي ځکه چې د ښاغلي کرزي د واک قانوني دوره
بشپړه شوې ده.
د ناټو چارواکو دا هم ویلي چې ممکن هغه څوک وروبلي چې د دوی په باور د افغانستان استازیتوب کوي.
د اشرف غني احمدزي ټیم ویلي، تر څو چې د دوی کاندید د
انتخاباتو په نتیجه کې ګټونکي اعلان شوی نه وي، د ناټو په غونډه کې ګډون نه
کوي خو د عبدالله عبدالله ټیم ویلي چې د دې ملاتړ کوي چې دواړه کاندیدان
دې د ناټو غونډې ته لاړ شي.
د ناټو مشران راتلونکې میاشت په خپله مهمه سرمشریزه کې د
افغانستان پر حالاتو په داسي حال کې خبرې کوي چې د ناټو پوځیان له
افغانستانه د وتلو په حال کې دي.
خو دوی ته لویه پوښتنه دا ده چې په دې سرمشریزه کې به د
افغانستان استازیتوب څوک کوي ځکه چې د افغانستان د انتخاباتو په نتیجه کې
ګټونکی ولسمشر تراوسه پوري اعلان شوی نه دی.
د افغانستان د ولسمشرۍ دواړه کاندیدان لا هم د رایو د تفتیش په جنجال بوخت دي.
لوېدیځوالو هیله لرله چې په افغانستان کې به قدرت په ارامه فضا کې انتقال شي.
د افغانستان د ولسمشرۍ د انتخاباتو د لومړي پړاو څلور ورځې
تېرېږي خو لا هم حامد کرزی، چې د ولسمشرۍ دوره یې پای ته رسېدلې ده، په ارګ
کې دی او واک په لاس کې لري.
دیپلوماتان وايي چې ښايي د ناټو د مشرانو غونډې ته، چې د
سپټمبر په څلورمه او پنځمه د بریتانیا د ویلز ایالت په سیلټیک منور کې
جوړېږي، حامد کرزی وروبولي او یا هغه څوک دعوت شي چې د افغانستان استازیتوب
کولی شي.
رویټرز خبري اژانس وايي چې په سرمشریزه کې د ولسمشر کرزي ګډون
تخنیکي ستونزې پېښوي ځکه چې د افغانستان په اساسي قانون کې د نوموړي د واک
دوره پای ته رسېدلې ده.
د کرزي ګډون د امریکا متحد ایالتونه هم خوابدي کولی شي ځکه چې کرزي ورسره په امنیتي موافقه کې مخالفت کړی.
که امنیتي موافقه، چې د ولسمشرۍ دواړو کاندیدانو یې د
لاسلیکولو ژمنه کړې ده، لاسلیک نه شي، باید ټول نړیوال پوځیان د سږ کال تر
پایه له افغانستانه ووځي.
رویټرز خبري اژانس ته یوه دیپلومات، د نوم د نه څرګندېدو په شرط، ویلي چې ناټو نه غواړي چې د دوی غونډه کرزی ورخرابه کړي.
له افغانستانه د ناټو پوځیانو د وتلو په حال کې وسله والو
طالبانو حملو ته زور ورکړی او نه یوازې ملکیان وژني بلکې پر بهرنیو
مرستندویانو هم یرغلونه کوي.
په داسي یوه حالت کې د رویټرز خبري اژانس د راپور له مخې د
اوسنیو سیاسي لانجو حل ته چټکه اړتیا پیدا کېږي خو داسي لږ نښه ښکاري چې د
ولسمشرۍ دوه کاندیدان اشرف غني احمدزی او عبدالله عبدالله دې جوړجاړي ته
غاړه کښېږدي.
د ولسمشرۍ د انتخاباتو د کاندید اشرف غني احمدزي د انتخاباتي
ټیم یوه ویندوی طاهر زهیر وویل:«موږ هیله لرو چې د انتخاباتو مسله به د
ناټو تر سرمشریزې پوري حل شوې وي. که لانجې دوام وکړ نو دا به زموږ او
نړیوالې ټولنې لپاره لویه اندېښنه وي.»
ده په عین حال کې وویل:«نوی ولسمشر باید د ناټو په سرمشریزه
کې ګډون وکړي، خو که د انتخاباتو نتیجې څرګندې نه وې او موږ ته د ګډون بلنه
راکړای شوه، موږ به پکې برخه وانخلو ځکه چې دا به شرموونکې وي.»
خو د رویټرز خبري اژانس د راپور له مخې عبدالله عبدالله د دې
پلوی دی چې دواړه کاندیدان یا یې استازي د ناټو په غونډه کې د افغانستان له
لوري ګډون وکړي.
په بروکسل کې د ناټو یوه چارواکي وویل:«دا ډېره مهمه ده چې د
افغانستان راتلونکی ولسمشر امنیتي موافقه ژر لاسلیک کړي. وخت مهم دی او
سرمنشي (د ناټو) په زغرده ویلي چې له قانوني موافقې پرته ناټو له ۲۰۱۴
وروسته په افغانستان کې د روزنې ماموریت پر مخ نه شي بېولی.»
ټاکل شوې وه چې د افغانستان نوي ولسمشر د اختر په پنځمه لوړه
په ځای کړې وای او د افغانستان په تاریخ کې د لومړي ځل لپاره له یوه منتخب
ولسمشره بل ته په سوله ییز ډول واک لېږدلی وای.
