د افغانستان د انتخاباتو خپلواک کمیسیون وايي چې له نن سهاره د
رایو د باطلولو بهیر درېدلی دی.
په همدې حال کې د عبدالله عبدالله د اصلاحاتو او همپالنې د
تخنیکي ټیم مرستیال نن څرګنده کړ ه چې دوی د رایو د دپلټنې او ابطال بهیر سر له
ننه رسماً تحریم کړې او تر هغو په دې بهیر کې ګډون نه کوي چې غوښتنې یې منل شوي نه
وي.
د عبدالله عبدالله د تخنیکي ټیم مرستیال محمد الله حیدري وویل
چې د انتخاباتو له کمیسیونه د دوی ټول څارونکي وتلي او نور په دې پروسه کې
برخه نه اخلي.
له بله پلوه ، د انتخاباتانو د خپلواک کمیسیون مرستیال ريیس عبدالرحمن هوتکي
وویل چې د رایو د باطلولو لړۍ یې د دې لپاره درولې چې د عبدالله عبدالله د
اصلاحاتو او همپالنې ټیم څارونکي تراوسه پوري نه دي راغلي.
دا په داسي حال کې ده چې پرون ملګروملتو، چې د عبدالله عبدالله
د انتخاباتي ټیم په اصرار یې د افغانستان د ولسمشرۍ د انتخاباتنو د دویم پړاو د پلټنو
او څارنې زیات مسوولیتونه په غاړه اخیستي دي، اعلان وکړ چې که د کوم کاندید
څارونکي د رایو د پلټنې او ابطال پروسه بایکاټ هم کړي، دا لړۍ به دوام وکړي.
د اصلاحاتو او همپالنې ټیم پرون خبرداری ورکړی و چې که نن
سهاره پورې د رایو د باطلولو په برخه کې د
دوی غوښتنې ونه منل شوې، خپل څارونکي به له دې بهیره وباسي، کار به ختم شوی اعلان
کړي او د انتخاباتو نتیجه به ونه مني.
د انتخاباتو د خپلواک کمیسیون مرستیال رييس وايي، هڅه کوي چې
تر نن غرمې پوري د رایو د باطلولو پروسه بېرته پیل شي.
تېره شپه عبدالله عبدالله او اشرف غني احمدزي له ولسمشر کرزي
او د هغه له دوو مرستیالانو سره په ارګ کې اوږدې خبرې وکړې خو ارګ د دوی د خبرو
اصلي جزییات نه دي په ډاګه کړي.