دافغانستان او پاکستان لپاره د امریکا ځانګړی استازی وايي: امریکا پخپل وخت د رایو دپلټنو دبهیر دبشپړیدا غوښتونکې ده
د افغانستان او پاکستان لپاره د
امریکا ځانګړي استازي، ډن فیلډمن چې دګسټ په اوویشتمه نیټه افغانستان ته رسیدلی، وايي چې د امریکا متحد ایالاتو په خپل
ټاکلي وخت د افغانستان د ولسمشرۍ د انتخاباتو د رایو د پلټنو د بهیر د بشپړېدو
غوښتنه کوي.
د متحدو ایالاتو د بهرنیو چارو وزارت
افغانستان ته د ښاغلي فیلډمن له رسېدو پس په یوه خبرپاڼه کې ویلي دي چې د افغانستان او پاکستان لپاره د امریکا ځانګړي
استازی د دې لپاره کابل ته تللی چې د افغانستان د انتخاباتي بهیر د ملاتړ لپاره ،د
امریکا د باندنیو چارو د وزیر جان کیري وروستی
سفر او ټېلفوني خبرې تعقیب کړي.
د افغانستان او پاکستان لپاره د
امریکا ځانګړي استازي په خپل وخت د افغانستان د انتخاباتو د بهیر د بشپړېدو
او د پایلو د اعلانېدو پراړتیا ټینګار کړی او ویلي یې دي چې باید د ملیونونو افغانانو رایو ته درناوی وشي
او د هغو پر اساس په افغانستان کې مشروع او د ملي یووالي حکومت جوړ شي.
په همدې حال کې په افغانستان کې د
ملګروملتو مرستندوی دفتر یا یوناما وايي چې د رایو د پلټنو او ابطال له بهیره د دواړو انتخاباتي ټیمونو د څارونکو له وتلو
وروسته ډېره هیله لري چې د افغانستان د ولسمشرۍ د انتخاباتو پایلې به ژر څرګندې
شي.
وروسته له دې چې د عبدالله څارونکو د
رایو د باطلېدو بهیر بایکاټ کړ، ملګروملتو د اشرف غني احمدزي له څارونکو هم وغوښتل
چې په دې پروسه کې ګډون ونه کړي.
اوس د یوناما، نړیوالو څارونکو او د
افغانستان د انتخاباتو د خپلواک کمیسیون تر څارنې لاندې د رایو د باطلېدو بهیر
دوام لري.