دانتخاباتو دتخنیکي او سیاسی بهیر دپریښودو په اړه د عبدالله عبدالله ټیم نوی ګواښ

د اصلاحاتو او همپالنې ټيم یو ځل بیا ګواښ کړی ؛ که غوښتنو ته یې ترڅلرویشتو ساعتو یاني سباورځې پورې مثبت ځواب ورنکړل شي،  د انتخاباتو له تخنیکي او سیاسي بهیر سره پرېکون اعلان کړي.

د دې ټيم ویاند سید فاضل سانچارکي د دوشنبې پر ورځ په کابل کې خبریالانو ته وویل؛ تر هغو چې د رایو رښتینې پلټنې  ونه شي او سیاله ډله یې په پیل شوي سیاسي پروسه کې صادقانه عمل ونه کړي؛ دوی به دواړه بهیرونه په  پرې کړې توګه  پرېږدي.

سانچارکي همدارنګه د انتخاباتو دخپلواک کمیسیون هغه پریکړه هم رد کړه  او د نه منلو وړ  یې وبلله چې وایي، په راتلونکو څو ورځو کې به د انتخاباتو پایلې  اعلان کړي.:

"«هره پایله  چې د انتخاباتو  د  درغلیونه  ډک کمیسیون یې اعلان کړي ، موږ یې ردوو او که تر سبا (دسې شنبې تر ماسپیښنه ) پورې ، زموږ معقولو غوښتنو ته پام ونه شي، موږ به دا بهیر پریږدو"

سانچارکي همدارنګه دا هم  وویل چې،  د ملي یوالي حکومت جړولو ته هغه وخت حاضر دي چې ، په شفافه توګه  ناپاکې رایې له پاکو رایو نه بیلې شي ..

 نوموړي وویل، د دوی ټيم د نړیوالې ټولنې په غوښتنه د مقابل ټيم سره خبرو ته حاضر شوی او که سیال ټيم یې په خبرو کې صداقت ونه لري؛ نو دا بهیر به هم ودروي.

په همدې ډول دې ټيم د هغې څه په اړه چې دوی یې په انتخاباتو کې درغلۍ بولي؛ یو ځل بیا ځینې اسناد له رسنیو سره شریک کړل.

د دې ټیم یوه غړي محمد بشیر فاروق رسنیو ته ځینې اسناد وښودل چې؛ په وینا یې په ۲۲۰۰ محلونو کې رایې پاڼې د یوه یا دوه کسانو له خوا ډکې او امضا شوي دي..